18 Giugno 2011
Categoria : lingua/limba
Sardigna mia arcana e antiga terra de Anghelu de sa Niéra
Sardigna mia,
arcana e antiga terra
puru si so atesu
t’ido ogn’ora
riende allegra
cun su chelu ‘e rosa
cando sos carros current
de s’Aurora.
Bido sos montes
tochende su chelu
e sas codinas
riende fioridas
e-i sa ‘inistra
basende s’usciareu
ballende
cun su ‘entu
che bajanos
cand’iscominzant
carignos de amore.
Bido sas baddes
ue sos pastores
mimulant
caminende
sas otavas.
E bido a tie puru
Tzaramonte,
ue sas domos
che arveghes biancas
pigant et falant
da- e Monte ‘e Cheja
finz’a sa Niera
ue sa domo
de sa pitzinnia
frisciada a giae
isetat solu
chi calicunu
entzat
a dare lughe
a dare vida.
