S’umbra de su tempus de Luca Mele IV prèmiu ex aequo Otieri 2012 a contivizu de Domitilla Mannu
S’umbra de su tempus Luca Mele de Piaghe
Seranu atunzinu,
in s’ora chi su sole in biligu,
suspendidu in cuccuru ‘e su monte
e si partin sa lughe
ambas duas palinzas.
A lenu e muda, ai cust’ala, falat s’umbra
che sonnu in ojos de criadura.
Benit dulche, longa,
che dae unu passu mai finidu,
istudende su brujore
in terras rujas de vulcanu,
su ‘irde ‘iu fozidu e su lugore sutzosu
in su biaittu meru’e sos budrones.
Calat isterrida s’umbra carignos
in sas istulas grogas
e dae sas chimas de sas arveres
recuit sa lughe sua su sole.
Est una chinnida
E in s’umbra e cussu tempus so leadu
Intramadu in chelos de majia.
M’ ‘ido pitzinnu in d’un’ora che-i custa.
Miro iscampulos de vida,
caras de zente amada,
intendo’oghes amigas
e, in sa paghe soberana,
isculto su battidu ‘e su coro
che chi esseret accordadu cun s’issoro
cando sa notte criaiat sonnios cun su sole
sutt’ ‘e s’oju malisciosu de sa luna
e fin dulches sas oras de sa vida.
Cuss’ora a su tempus l’est fuida
e como la ‘ido innida, pintada
in custu toccu de umbra
ue, che mama coidadosa,
presente est sempre istada a chie,
in su drettu dae coro a mente,
at su sentidu de coglire un’iscampiada
de su mundu istempuradu
ue s’abberat sa majia.
————–
