Categoria : versos in limba

“Musa amiga” de Franco Piga

Musa amiga.

Poesia di Franco PigaTrintases retrogadu a fiore e torradu a latu.

Franco Piga su 30 ‘e Nadale 2011

Lughet che seda s’aéra
mustrende frinas d’eranu
ch’in coro pones serena.

De tant’amore piena
che fiore chi dat bantu,
piena ’e amore tantu
chi ’antu dat che fiore,
piena de tant’amore
chi ’antu che fiore dada,
Musa amiga e disizada
che jana ti ses mustrada,
dulche su coro cumpones.

Lughet che seda s’aéra
mustrende frinas d’eranu
chi serena in coro pones.

Solos, cumprida m’impones
bolos chi naran de vida,
solos, m’impones cumprida
chi naran de vida bolos,
cumprida m’impones, solos
bolos chi de vida naran,
e s’anima a issa paran
cando, cun penas imbaran
cun coragiu e bonugoro.

Lughet che seda s’aéra
mustrende frinas d’eranu
chi pones serena in coro.

Totu a parte, che tesoro
mustras su connotu, s’arte,
che tesoro, totu a parte
mustras s’arte, su connotu,
a parte, che tesoro, totu
su connotu, s’arte mustras,
ch’in mente pones, illustras
e poi, limas e lustras
netu dendelu a sa manu.

Lughet che seda s’aéra
chi pones serena in coro
mustrende frinas d’eranu.

Puru a Deu soberanu
pones seguru in boleu,
puru a soberanu Deu
in boleu pones seguru,
a Deu soberanu puru
in boleu seguru pones,
riverente non t’opones
bene naras e cumpones
che totu, a Issu t’inchinas.

Lughet che seda s’aéra
chi pones serena in coro
d’eranu mustrende frinas.

Mastra de giaras dutrinas
de rimas caras sorrastra,
de giaras dutrinas mastra
sorrastra de rimas caras,
mastra de dutrinas giaras
sorrastra de caras rimas,
de sos sentidos ch’istimas
e pones in altas chimas
cun ateras meledende.

Lughet che seda s’aéra
chi pones serena in coro
frinas d’eranu mustrende.

Tantos giaman, disizende
a tie, cantos reclaman;
tantos, disizende giaman
reclaman a tie, cantos;
giaman disizende tantos
cantos reclaman a tie,
ogni note e ogni die
non t’importat cale o chie
ca ses un’amiga vera.

Mustrende frinas d’eranu
ch’in coro pones serena
lughet che seda s’aéra.

Ses forte, bella e fiera
che prella ’e totu cunsorte,
fiera ses, bella e forte
cunsorte ’e totu che prella,
forte ses, fiera e bella
che prella cunsorte’e totu,
s’amore pones in motu
in chie sempre est devotu
chentza oriolu ’e moneda.

Mustrende frinas d’eranu
ch’in coro pones serena
lughet s’aéra che seda.

Bia e nota da-e meda
tota  gustu e cortesia,
da-e meda nota e bia
gustu e cortesia tota,
bia da-e meda e nota
tota  cortesia e gustu,
e chentza pena o assustu
sempre signalas su giustu
a chie sentidos giughet.

Mustrende frinas d’eranu
ch’in coro pones serena
s’aéra che seda lughet.

Batis, sempre manu-manu
pensares che-i sa rena.

Commenti sono sospesi.

RSS Sottoscrivi.