Categoria : versos in limba

Prenda lontana di Franco Piga a contivizu di Domitilla Mannu

Prenda mia chi ses sola
solu a tie so pensende,
ca su tempus m’est lassende
e mi paret bola-’ola.
Che fùsida furriola
custu coro mi l’intendo,
prenda mia non cumprendo
custa sorte it’est fatende.

 

Prenda ’e oro, amada mia
ogni cosa lassa istare,
como ’enzo a ti chircare
ca ti chelzo a cumpagnia.
Prenda cara tue ebbia
ses funtana de consolu,
ite fato deo solu
si so fatu pro t’amare.

 

Ite fato si non miro
sas istellas ch’as in cara,
sa bellesa tua rara
chi m’afadat e ammiro.
Peno, piango e suspiro
isetende cussa die,prenda cara, solu a tie
sun sos versos ch’apo in laras.

 

Pro te s’anima s’ischidat
e m’iscaldit premurosa,
de cust’amore est isposa
e cun sa tua s’achidat.
Anima chi sa sorte isfidat
ca pregat dies de gosu,
già li deghet su reposu
in bratzos de una rosa.

 

Ses cun megus ogni istante
chentza t’àer in presentzia,
ite pena e penitentzia
a sa morte simizante.
Sorte! Mira ch’est bastante
ca est tropu su sufrire,
como est ora de sighire
cun s’amore s’esistentzia.

Mentzione de onore Premiu literariu “Gurulis Vetus” Padria 26 de austu 2012

Franco Piga su 7 de triulas 2012 Vedi anche in  www.luigiladu.it col profilo e altre liriche e il sito dell’autore www.francopiga.it/

Commenti sono sospesi.

RSS Sottoscrivi.