A Gesus in allegria a cura di Domitilla Mannu

A Gesus in allegria est una cantone chi fintzas a unos trint’annos como alu si cantaiat in sas biddas de s’Anglona e de su Logudoro, mancari cun calchi versu cambiadu, in pius o in mancu, a segundu de su logu, su sero de s’ultima die de s’annu. Sos pitzinnos andaiant peri sa bidda, dae gianna in gianna, cun una beste de cabidale pro saccheddu, a cantare custa cantone de bona ura pro s’annu nou. In su 1982 apo rezistradu custa cantone dae sa boghe de tia mia, Giuannina Gallu .

 

A Gesus in allegria
totu su mundu at salvadu
Cristos s’est inzeneradu
in sas intragnas de Maria

 

oh Maria gloriosa
Virgine innantis de partu
e a pustis de su partu
restesit virgine e pura

 

cussa divina giarura
nos siet in cumpagnia
gia chi est nadu su Messia
Gesus Giuseppe e Maria.

 

e bona notte e bon’ annu
e bonas Pascas cumprida(s)
Deus bos diat vida
e mezus a un’àter’annu.

 

E sighiant cantende

 

Custa est una coileta
sa chi nois bos cantamus
su chi nos dades leamus
cariga saltitza o peta.

 

A gabbadu de cantare, sa gianna s’abberiat e sos padronos de domo daiant a sos cantadores de su chi aiant in domo. A bortas calecune non abberiat sa gianna, tando sos pitzinnos cantaiant:

Tira tira sa colora
dae su letu a su foghile,
cantu nd’azis dadu a mie
nd’apedas intro e fora.

 

O puru cust’àtera

In domo de Mamuscone
m’apo tesu sos pannos
trinta dimònios mannos
bos chindulent su sacone.

Cando retziant calchi cosa, a sa bessida in su jannile cantaiant custos versos pro torrare gràtzias:

gia chi nos azis regaladu
cun gustu e allegria
vivat sa cumpagnia
e totu su parentadu.

 

A sa matessi manera su 5 de bennarzu sos pitzinnos bessiant a cantare a sos tres res:

S’avviant sos tres res in giusta ghia
cun sos bolantes suos assistentes
un’isteddu at bessidu in Oriente
in favore a Giuseppe e Maria
e sempre ca est nadu su veru messia
chi est su Deus Onnipotente
un’isteddu at bessidu in Oriente
chi dat vida a s’anima mia.

Si nde falant dae caddu totos tres
e tzocant in sa janna beneita
nende “ Semus nois sos tres res
benimus a bos fagher s’imbisita”

S’Anghelu Gabriele ‘atende rosa(s)

pro coronare su veru Messia
Santu Giuseppe cun sa sua isposa
E duos pastoreddos a cumpagnia.

 

Custa est una coileta
sa chi nois bos cantamus
su chi nos dades leamus
cariga saltitza o peta.

Si sa janna s’abberiat e retziant calchi cosa, repitiant sos versos de bonas uras de s’ultima die de s’annu, e gai matessi sos de malas uras si sa janna imbaraiat tancada. Cumpridu su giru sos piseddos si partiant totu su recatu.

 

 

LASCIA UN COMMENTO

RSS Sottoscrivi.