Categoria : versos in limba

Nott’ ‘e istiu di Giangavino Vasco a cura di Domitilla Mannu

Nott’ ‘e istiu

Lughes attesu, biddas appiccadas,
custa nott’ ‘e istiu so mirande;
in costa de sos montes fraigadas,
a ómines istraccos dan reposu.
Su mundu paret frimu, s’est pasande
e da-e custa paghe traet gosu.

 

Boghes intendo in giogos de pitzinnos
ch’ischidan sas carrelas prùs antigas,
e sos piccoccos drommin cun sos ninnos
chi li cantan sas mamas cun amore.
Sas mèrulas chi pasan in sas trigas,
isettan de manzanu primu albòre.

 

Melodias de giòvanos cantande
s’aera prenan de malinconias,
ca cussos cantos ch’issa m’est mandande
in custa conca ammentos mi nd’ischidan.
De sa chiterra sonos, armonias,
mi tremen custu coro, ca l’impidan.

 

E si sos ojos altzio a’ cussu chelu,
mi paren sos isteddos dimandande
si ch’at in custu mundu ancora anelu
de bider paghe in ‘ortuladas terras,
inube zente b’at ch’est disizande
nottes coment’ e’ custa, chena gherras.

 

 

18 luglio 2006

 

(Menzione d’Onore al 5° Concorso “Prémiu ‘e poesia sarda Durgali- BARDIA” – Dorgali  18.11.2007)

 

LASCIA UN COMMENTO

RSS Sottoscrivi.