“Cantone subra Davide su re Santu” de Anghelu de sa Niera
Carulu istimadu e tribuladu, tribulados comente semus totu: chie non l’ada in pes l’ada in coddu. In tantos arejnos chi si suni fatos in cust’istiu amus faeddadu finza de sa fide no solu in s’istradone, bi suni cuddos chi narana chi bi creene e cuddos chi narana chi no bi creene (poi bisonzat bidere ite li narat su coro).
Tzertu finza a su 1848 totu bi devian creere pro fortza e andare a cheja a sas festas cumandas, si non b’andaian benian signados finza in su liberu de sos istados de sas animas (sa veridade si nelzat, sos prideros custos rezistros o no lo impitaiana o los ana brujados).
Dae su barantotto ognunu fidi liberu de creere o de no creere, de andare a cheja o de no bi andare. Poi est bennidu un ateru barantotto, cussu de su millenoichentos. Un articulu de s’istatudu de su partidu comunista narait chi sos iscrittos devian professare sa dotrina marxista e su materialismu istoricu, tando sa cheja, at mandadu s’iscomuniga, ma meda cristianos ana votadu su matessi cussu partidu e ‘istoria poi est andada comente est andada, ma intantu un ateru grupu de cristianos an lassadu sa cheja. Oe lu idimus cun sos ojos sa dominiga andana a cheja fortzis su deghe pro chentu o fortzis su vinti. Non m’ammento s’annu, ma cando ana fatu sas istatisticas Tzaramonte in tota sa diozesi fini a s’ultimu postu cun Poltuturre su deghe pro ghentu.Agni modu no si devet pessare chi chie no andat a cheja noi siat unu credente, anzis don Tilocca ogni dominiga no faghiat cumprendere chi sos chi andaimus a cheja fortzis fimus peus de cuddos chi no b’andaiana. Calchi olta appo pensadu: – Como no chi enzo piusu, gai so pius bonu!- in veridade, deo ando a cheja ca mi sento peccadore abituale pius de soso ateros e quindi appo bisonzu de pregare pius de sos ateros chi, ad esser Deus o sa nadia, sunt pius bonos de a mie!
Ad ogni modu, brinchende custos arrejnos, in custu gosu, fato sa professione de fide de unu pecadore. Devo falare in tzitade pro sos meses chi sighini e prima de serrare sa domo m’est bennida sa gana de faghere un ateru goso.
Tzaramonte m’ispirat su chi Tatari nemmancu mi cunsizat.
Pro sa Fide in Deus
A totu su mundu cunfesso
Sa fide in Cristos Jesu
Si puru cando bi pesso
Mi ‘nde sento tantu atesu
Ca’ so malu e pecadore
Sempre reu pro natura
No mi bastat su dolore
De Davìde in s’isventura
Bonu e Santu fit su Re
Beneitu dae Deus
Tantu da non poter cre’
C’amait tzertos recreus.
Una die dae su balcone
At bidu muzere anzena
Conzepeit che unu furone
De si l’invitare a chena
Poi leadu dae passione
Bochid’ada su maridu
Gai l’at tenta in su masone
de cantu fit isgradidu.
Tando Nathan jaru jaru
Ja bi l’at betadu in cara
-Tue re chi fisi faru
de su pobulu ses bara
Asa mortu su maridu
As peccadu in nant’ a Deus
Como asa esser punidu
Pro totu custos recreus
Tando Davide in piantu
Si ‘nde ogheit sa corona
E betteit finza su mantu
Ponzeit sacu in sa pessona
E pro notes e dies mannas
Senza lughe e in sa chigina
De sa regia intra sas jannas
piangheit a boghe altina
Miserére Deus meu
Chi ses misericordiosu
No m’ idas che unu reu
Ma che omine penosu
Deo puru che i su re
piango sos peccados mios
Ca so lebiu in su cre’
Ap’a pienare sos rios
Perdonami Deus meu
Dae totu sos peccados
De s’abuddu ‘e sos recreu(s)
Chi fini malefadados
Tue solu ses s’ispera
de totu sos pecadores
tue solu de cust’isfera
perdonanos sos errores
Tue ses Deus Criadore
De totu custas istellas
De su mundu ses Segnore
De totu sas cosas bellas
Asa fatu terra e Chelu
Mare e abbas de totue
Sole e luna e biancu velu
E ogni cosa chi si fue (t)
Asa fattu Adamu e Eva
Omines d’ogni zenìa
Tue as criadu ogni elva
Somas de ogni nadìa
S’omine si nd’est fichidu
su dimoniu l’at tentadu
cudda mela nd’at boddidu
a su male est destinadu
Tando misericordiosu
Cristos Jesu asa mandadu
Dae su coro piedosu
A sa rughe l’amus dadu
Iss’at salvadu su mundu
Dae totus sos peccados
Rutos che semus in fundu
Che i sos malefadados
Poi est bennidu s’Ispiritu
Pro nos donare sa lughe
E procurare su meritu
A chie l’atzetat e lu giughe(t)
Custa est sa nostra fide
Dae apostulos trasmissa
Chie no est tzegu ja la ide(t)
Si s’anim’at suttammissa
Si no b’est s’umilidade
De atzetare s’Evangelu
Milli oghes caru frade
Podes mandare a su chelu
Sa lughe ‘e s’inteligentzia
Podet fagher milli giros
Si no asa sa passentzia
Mi faddis totu sos tiros
Deus Babu Criadore
Jesusu Segnore Nostru
Ispiritu lughe ‘e albore
Salvade nos dae su mostru.
Anghelu ‘e sa Niera
