“La Bibbenna” di Pietro Meloni V.E.N.

Brutoni d’oru a fini statiali
venini da li stazzi omini folti
pa’ taddha’ l’ua illa ‘igna e illa colti
e impustalla illu pastricciali.

E noi pa’ augura’ lu bonu ‘inu
femu un “signu di cruci” a li ‘iti
una preghiera pa’ sta tutti uniti
un licori sarà lu “vermentinu”.

Illi stazzi fora di li chintini
li carrateddhi so’ posti illi ghjanni
illa ‘igna li minori e li manni
ponini l’ua taddhata illi spultini.

Li spultini pinati di brutoni
so’ garrigati illi carrul’a boi
l’ua illu laccu calcichemu noi
a pedi nudi e a culti calzoni.

Diiltimentu e un pocu di fatica
illa casa si spagli un bon’odori
puppioni calcicati cun sudori
e lu mustu buddhitu a l’antica.

Illa beltula è prontu lu gustari
punimu in banca dugna “be’ di Deu”
casgiu e salticcia fatta a modu meu
pani, salamu, laldu e calamari.

La cumpagnia oggi è tutta in festa
canti a chiterra e vinu in cantitai
lu ‘inu ‘ecchjiu no’ s’agabba mai
l’ua è abbundanti e no’ è celtu aresta.

Demu “la palti” a amichi e parenti
e n’adduchemu pa’ li dimandoni
a la ghjesgia mandemu dui brutoni
e tutti si ni paltini cuntenti.

10 settembre 2021 Piwreo Meloni V.E.N.

 

LASCIA UN COMMENTO

RSS Sottoscrivi.