Gosos de Santa Rughe de Melchiorre Murenu (1803-1854)
1.
Fecunda arbure fiorida,
viva misteriosa pianta,
preziosa rughe santa,
arbure d’eterna vida.
2.
Custu est arbure fecundu
d’immensu, infinitu amore,
inue su Salvadore
hat redimidu su mundu,
salvande da’ su profundu
s’umanidade affligida.
3.
Est cust’arbure costante,
unicu umanu cunfortu
chi conduit a su portu
su piùs tristu navigante
e chi dat lughe bastante
a s’anima redimida.
4.
Arbure celestiale,
fruttu de s’Onnipotente,
pianta viva, risplendente,
rimediu de ‘ogni male
chi su devotu mortale
tenet in coro impremida.
5.
Mistica arca de Noè
in cust’adde tempestosa,
vara illustre prodigiosa
de su profeta Mosè,
scettru de su. eternu Re
bandel’in alt’istendida.
6.
Giae chi sola aberzesit
sas duras portas de chelu,
rughe chi senza rezelu
s’umile mundu adoresit,
ue a Giuanne intreghesit
cudda Mamma addolorida.
7.
Tronu d’alta elezione,
suprem’istella divina,
cattedra d’alta dottrina,
mare de consolassione,
portu de salvassione
in cudd’ultima partida.
8.
Lettu ue istesit dormidu
cudd’anzone immaculadu,
in’ue l’han incravadu
e a sa morte reduidu,
chi fit tantu consumidu
fattu tottu una ferida.
9.
Vessillu de sa milizia
de cuddu divinu Marte,
bandela e forte istendarte
contr’a s’astuta malizia,
vera eterna giustizia
contr’a sa culpa omicida.
10.
Tronu eccelsu, singulare,
de giustissia divina,
chi servit de meighina
cando nos têt giudicare,
signu chi si têt mustrare
in cudd’ultima ‘ennìda.
11.
Lughe vera, naturale,
de isplendore sempiternu
ch’hat superadu s’infernu
cun cudda rughe immortale,
chi non si dat s’eguale
a sa lughe isclaressida.
12.
Arbure santa, dicciosa,
tue sola istesis digna
de portare cudd’insigna
eccellente e portentosa:
vera arbure misteriosa
chi dognunu l’hat sjghida.
13.
Pianta chi cun lughe tanta
das lughe a su mundu tottu,
cust’oratoriu devotu
infiamma ‘e fide santa,
preservala, alta pianta,
cun paghe eterna cumplida.
14.
Rughe santa, piedade
tene ‘e custa cunfraria,
sempre li sias de ghia
pro sa tua bonidade,
pustis in s’eternidade
regnet cun tegus unida.
15.
Ses in su mundu naschida,
sola e unica pianta,
preziosa rughe santa,
arbure d’eterna vida.
