Sos fundamentos de un’obera de artista de Anghelu de sa Niéra
Chie, pro unu motivu o pro un ateru at devidu lassare sa idda sua inue at passadu nessi sa pitzinnia, a issa torrat in milli modos, ma supra totu cun sos sentimentos. Custa esperientzia ant proadu tantos poetas e tantos iscritores non solu, ma finza sos cineastas, sos pitores, sos iscultores e.i. sos musicistas. De sos poetas podimus ammentare Giagu Leopardi e Giuanne Pascoli pro no faeddare de Gabriele d’Annunzio, de sos iscritores sa Grazia Deledda nostra e Giuanne Verga chi umpare leant sa zente connota in pitzinnia e che las ponent e las faghent mover comente in d’una moviola in sos contos, in sos contados e in sos romanzos issoro. Chena ammentos e recuidas a sas bidda issoro non si podent immaginare sos protagonistas de sas oberas ch’ant iscritu. Non fentomemus Alessandro Manzoni e Ippolito Nievo e chen’andare trop’attesu s’ammentant de sa terra issoro fina sos ultimos iscritores zovanos chi ant apidu fama in totu sa Sardigna e fina in sa Penisula. Sos logos inue semus naschidos e creschidos sunt atacados a nois che.i.sa pedde a sa carena e s’inteligentzia cun sa memoria e sos sentimentos si sunt inzennerados manu manu chi semus creschidos peri sas carrelas, sos tirighinos, sas chejas, sas festas e sas esperientzias chi amus apidu in familia o peri sos parentes e amigos. Meda zente pagu istruida, pro non narrer lega, pessat chi un artista cun sa fantasia fetat totu: s’idet chi non ant istudiadu Aristotile e Santu Thomas d’Aquino chi narant umpare: nudda est in sa mente si primu no est istadu toccadu dae sos sentidos e pro la narrer in latinu nihil est in mente quod prius non fuerit in sensu. In pagas peraulas si un iscritore o poete no at fatu esperientzia pessonale nessi in pitzinnia comente faghet pustis a faeddare de sos protagonistas de unu contadu, de unu romanzu o a proare sos entimentos chi li brotant dae una poesia? Primu b’est istada sa vida, sa ptzinnia o sa gioventura o pustis bi sunt sas recuidas e sos sentimentos, sos faeddos, sos contados e d’ogni bene de bonas e malas sortes chi at incontradu. Custas cosa sunt a fundamentu de sa narrativa e de sa poesia, chena issas no b’at nudda ite narrer. Intamen b’est un’atera cosa de s’ammentare, non bastat sos ammentos, sas recuidas e sas isperas, bisonzat chi bi siat su tribagliu de s’autore de sas poesias o de sos contados, sa conca e.i. s’anima. No est chi unu chi s’ammentas de sas cosas ch’amus nadu si podet ponner a iscriere gai comente capitat e tando su giogu diat esser facile, ma s’iscritore o si cherides su poete devet ischire chi pustis d’aer iscritu sa prima bolta poi devet acontzare totu e tribagliare su contu o sa poesia che.i. su frailarzu su ferru, che.i. su mastru ascia sa linna e si cheret fagher s’artista bi devt torrare a tribagliare subra pius boltas fina a cando su contu o sa poesia est, pro nde narrer una: lebia lebia, musicale, limpia che i s’aba de su mare cando est frimmu e no b’at bentu. A boltas sutzedit chi unu poete improvvisadore siat gai bravu de mustrare d’esser un artista grandu, no est beru, s’improvvisadore si cheret fagher bella frigura i su palcu si devet preparare, ca si no faghet cileca comente est sutzessu medas boltas.
E tando pro nde ogare fune, bidu chi so istracu, s’artista devet tribagliare che unu mastru in sa butega e fagher in modu chi sa poesia o su contu nd’essat bellu che un arvure in beranu!
Deo e totu chi apo iscritu in italianu La maschera dalla gonna capitina intra s’istadiale de su 2006 e su 2007, puru si l’apo pubbricadu in su sitiu de Ztaramonte, lu so ancora curreggende, pessade chi l’po fatu leggere fina a unu lontanu nebode de Giuseppe Parini e a tant’ atera zente. Chie m’at cunsizadu una gosa e chie s’atera: su vicariu de Arzachena m’at nadu:- Lassa perder s’amore porcaccione de Maria Bellanca cun Brancone, allezerilu meda!- Su nebode de Parini:-Bidu ch’est unu romanzu istoricu, ripeta su calendariu universale pro sas dies de chida, b’est finza in internet.- Un’iscritore de Bologna m’at nadu, daeboi chi l’as curreggidu faghedilu leggere a boghe manna dae una bella picioca (chi no deves abaidare tropu) e t’as abizare chi sas ciarras longas istracant su leggidore e tando mutza ue b’est de mutzare. Leggidores mios custa mimula no finit mai. Peus pro a mie che mi so dadu a fagher su romnzeri dae betzu!
Deo naro Deo gratias pro custos cunsizos, ma si andamus adaenanti gai l’ap’a dare a s’editore cando ap’a giompere chent’annos e magari sos diritos de autore si los ant a mandigare fizos mios bidu chi semua in tempus de famine. Peristantu no mi so frimmadu e nde so ammanizende un ateru Il marchio dalla pròtome taurina, tota roba de idda nostra, deo bi so ponzende solu sa fabula e s’intreccio comente narat sos criticos leterarios, ancu andent totu olende peri sas aeras a iscominzare dae custu Onofri chi faghet dinari iscriende in sos zoronales de cussu porcu rassu chi est padronu guasi de trinta bullettinos de onzi die e faghet dinari dae busciacas nostras cun so bandos de’ sos mortos. Dae inoghe a pagu ant a bettare su bandu pro issu puru, ap’ischidu chi sa tumba istorica comporada e accontzada a nou est guasi pronta pro custu prograbu.
Como apo finza lassadu s’incunzadu bugliende bugliende! Creidemi frades mios no si nde podet pius de custos ricos mannales.
