Matibullosa majarza de Anghelu de sa Niéra
A s’avreschida
cumprendo
chi ses propiu
una majarza
ca’ ti mustras
a su sole
comente
aggradat a tie.
Como li mustras
sa cara
poi sas palas
tue li mustras,
e cando
t’andat a geniu
li mustras
finas su sinu.
E poi
dilli dilliriende
pianu pianu
tue a su sole
mustras sa matta dae nanti
e sa matta ‘e dae segus
chi sunt tundas
che-i sa mela.
Como deo
t’ap’iscobertu
chi cando
chentu muinas
faghes innanti
a su sole
tando m’atis a beranu
cun fiores de mudeju,
e cando t’ipozas tota
a li fagher su striptis
tando m’atis
meda caldu
cun sos giogos
de istiu.
E cando
ti estis torra
e mi saludas
su sole
cun sas fozas totu grogas,
tue gia m’atis s’atunzu.
E cando mi giogas
puru a cua gua goedda
s’ierru fritu
mi propones
‘e su giru benidore.
Su ballu dilliriadu
pro a tie
est unu giogu
ma pro a mie
chi so annosu
est buglia
pius che mala.
Riende riende
mi murmutas:
– Sos tuos giros
sunt finidos!
Est ora de ti nch’andare.-
-Gia m’inch’ando
terra niedda
gia m’incando,
giradora.
E pessare ch’in sa vida
creio, chi fit su sole
a fagher su ballu tundu
e imbetze fisi tue
mattibullosa
majarza.
Tzaramonte primos de Santu Aine 2011
