Categoria : lingua/limba, narrativa

Su computer de Pedru di Franco Piga


 Comente sempre, dae cando fit piseddu, Pedru s’ischidat primu chi fetat die e luego si nde pesat pro atzendere su fogu in sa tziminea.

Postu s’alluminzu leat unu fogliu de giornale de sa chida passada e iscricat su lominu ma, primu de ponner fogu, si frimmat unu mamentu pro dare una abbaidada e, a pagina intrea, leget sa publitzidade pro una marca de computer chi sun bendinde a pagu preju.

“Cheret chi mi detzida a faghere cust’aconcada.” Pensat Pedru, “Oramai lu tenen totu e a cantu paret no est birgonza, anzis l’imprean pro iscriere, e puru pro legere.”

Intantu, sa fiama de su lominu arrivit a sos poddighes e Pedru cun unu frastimu lassat andare totu e ponindesi unu poddighe in bucca sighit a frastimare.

Totoia, sa muzere, bintrende in coghina intendet Pedru afutadu ma chentza cumprendere it’est nende e tando preguntat: “E ite b’at, puite ses murrunzende, ite ti mancat?”

“Nudda, nudda.” Rispondet Pedru, pijende su fogliu de giornale pro si lu ponnere in busciaca e betada sa manu a su muntone de giornale betzos nde leat un’ateru.

Poi narat: “Iscu’… apo detzisu! Sapadu falo a bidda e mi comporo su computer, bene ti andat?”

Totoia, acaddende sa gafetera in su furreddu rispondet: “Ateru male t’at bennidu a conca… e ite ti nde faghes cando non ses bonu a l’impitare?”

Pedru, finidu de atzendere su fogu, si nde pesat dae imbenujadu e narat a sa muzere: “Inte’… ello Bachis mezus de a mie este? Ma l’ischis chi ocannu passadu at bendidu totu su casu cun su computer?”

Totoia, isetende chi nde pighet su gafè rispondet: “Beru, però atùa ch’at fatu totu su fizu chi ischit impreare internet, tue non solu no ischis it’est, ma non tenes mancu fizos. A mi naras comente faghes?”

Pedru, oramai cunvintu, rispondet: “Comente fato? Comente faghen totu, imparo! Ello, non t’as a essere ismentigada de cand’apo istudiadu pro sa patente, promossu m’ana… o nono?”

“Emmo, a sa ’e sete bortas bi las fata.” Rispondet Totoia, trateninde su risu pro non lu faghere arrennegare.

Umpare lean su gafè e Pedru ch’essit a murghere, unu pagu in pensamentu ma cunvintu e detzisu a faghere s’acuistu.

Su sapadu, a fata ’e die, Pedru est già in bidda, in su buteghinu de fronte a ue benden sos computer.

Andrìa, su barista, ponindeli adenanti un’ateru gafè e-i su tucaru, preguntat: “Corretto?”

Pedru faghinde chi nono cun su poddighe non girat mancu sa conca abbaidente fissu sa ‘idrina de fronte ue leget :”Computer House – Informatica per tutti.”

Andria, chi lu connoschet bene, sighit preguntende: “Pedru, ello comente in bidda goi chito, totu ’ene? Si as bisonzu de carchi cosa naramilu.”

“Nudda, totu ’ene! So inoghe puite apo detzisu de mi comporare su computer, su mezus chi b’este.” Rispondet Pedru, betende sa manu a busciaca pro pagare puite at bidu unu giovanu abberinde su locale inue benden su ch’est bennidu a comporare. 2

 “Cant’est?” Preguntat impressadu. “Nudda, bae chi oe cumbido deo.” Rispondet Andria, ratendesi sos pagos pilos chi tenet in conca e abbaidendesi s’omine chi, chentza mancu saludare, est già aberinde sa gianna pro ch’essire.

Arrividu a s’atera ala de s’istradone, Pedru aberit sa gianna de ’idru e bintrat in sa butega.

“Buongiorno signore, prego!” Lu saludat unu giovanu, bene postu e in gravata.

“Bongiorno.” Rispondet Pedru abbaidentesi in giru unu pagu ispantadu.

“Desidera qualcosa?” S’intendet preguntare.

“Emmo! Chelzo unu computer, su mezus chi tenes, o assumancu cantu su ch’as bendidu a compare Bachis.”

“Si ricordo, il signor Bachisio ha acquistato un buon computer completo di modem, stampante e un bel monitor a cristalli liquidi, il tutto corredato di sistema operativo e programma di calcolo e scrittura. Vuole che le illustri le specifiche?”

“Ite m’illustras e illustras!” Pedru est già perdinde sa passentzia. Li sutzedit sempre cando non cumprendet su chi li naran. “Batimi totu a domo intro ’e istasero e mira chi totu siat a postu, si nono non ti pago.”

Gai nende, li lassat unu bigliete inue aiat già iscritu, comente chi no esserat connotu, numene, sambenadu e su logu ue li ’atire sa cosa.

“Va bene signor Pietro, sarò da lei per le cinque. Consegna e installazione, più un paio d’ore di lezione sono comprese nel prezzo.”

“Bene meda!” Narat Pedru e chentza agiunghere mancu mesa peraula, girat de palas e ch’essit.

In totu, unu minutu e barantasete segundos.

Andria, chi lu ’idet torrende gai impresse, pensat: “Bah!, Pedru devet aer cambiadu idea.”

Ma ’intrende, s’omine paret cuntentu e infatis narat luego: “Pone a bufare, de cuddu ch’ischis tue, e custa ’orta pago deo.”

Su sero a sas chimbe, garrigu de iscatulones e puntuale, arrivit Frantziscu, gai si narat su giovanu chi l’at bendidu su computer.

“Buona sera signor Pietro, ho portato tutto. Dove desidera che lo installiamo?”

Una mesoreta e Frantziscu at già cullegadu totu, poi narat a Pedru: “Signor Pietro, le suggerisco di conservare le scatole per un certo periodo, non si sa mai. Adesso se è pronto possiamo iniziare con l’avviamento e lei, se già non le conosce, potrà imparare le funzioni più importanti.”

Pedru, chi pro s’ocasione si nd’at bogadu sas botas russas bullitadas e sas ghetas, si setzis a costazos de su giovanu chentza narrere nudda.

Frantziscu, comintzat a mustrare comente s’atzendet, comente s’istudat, comente si faghen partire sos programmas. Li dat a bidere comente iscriere una litera, comente faghere carchi contu e gai andende.

Poi, lu cullegat a internet e li mustrat, passende dae unu logu a s’ateru, canta cosa podet legere o bidere.

Bastat de iscriere solu una peraula e totu cumparit pro incantu. Li mustrat comente agatare e legere sos giornales, e non solu sa ‘Nuova e s’Unione’, ma totu sos giornales de Italia e de su mundu intreu. Cumparit fintzas una feminedda pagu ’estida. 3

 Pedru chi non cheret dare a bidere chi no at cumpresu nudda, feminedda a parte, preguntat:

Su casu! Narami comente fato a bendere su casu.

Frantziscu, chi cumprendet cantu non siat fatzile a tratare cun Pedru, rispondet: “Signor Pietro, una cosa alla volta, adesso lei deve prendere confidenza con il computer e poi, in seguito, vedremo come inserire gli annunci per vendere qualsiasi cosa, anche il formaggio.

Puru sos anzones?” Preguntat Pedru isperanzosu.

Anche gli agnelli.” Li rispondet Frantziscu. “Se lei e d’accordo, rimandiamo questa fase al prossimo sabato. Intanto le lascio un piccolo manuale di istruzioni dove potrà trovare parte di quanto le ho spiegato in precedenza.

Bene Meda!” Narat Pedru, chi pagat cantu b’at de pagare.

Poi, leada un’ampulla faghet: “Como setzidi in cue chi nos bufamos una tatzighedda de ’inu.”

Frantziscu chi non bufat, o assumancu non cantu bufat Pedru, s’abbaidat a Totoia, cuasi pedinde agiudu.

Issa, chi aiat sighidu totu sas ispiegatziones pro s’impreu de su computer, altziat sas manos, comente a narrere chi non podet fagher nudda, e partit a coghina pro preparare sa chena.

Duas ampullas daboi, Frantziscu resessit a si nde pesare e saludadu Pedru, si ch’andat.

Su computer est ancora atzesu. Pedru si setzit, si dat una frigada a sas manos e betat sa dresta pro aferrare su mouse. E gai comintzan sos problemas.

Sa ‘freccia’, comente l’at giamada Frantziscu, andat pro contu sou, bastat una movidedda e partit che furriola chentza resessere a la domare.

Pedru astringhet su mouse ancora pius forte, proende a la frimmare cun sa fortza e pensende: “E deo ti naro chi ti frimmas, as a bidere chi già pones mente…

Ma nudda, areste fit e areste restat.

Pro agiunta, in su mentre ’intrat Totoia, chi ’idindelu totu impignadu li narat: “Preguntali comente faghen sos culinzones de regotu, dia cherrer ischire si bi ponen sa ’eda comente fato deo, o s’imprean carchi atera cosa.

Muda tue! Ite nd’ischis… ite lu faghes chi sia gioghende… torra a su chi fis faghinde.”

Totoia, chentza mancu li rispondere, asciutendesi sas manos in sa falda, girat de palas e torrat a coghina. “Custa ’orta ch’essit male.” Pensat intr’e se, connoschinde su maridu.

Poi chenadu, Pedru torrat a su computer, detzisu a nde ’ogare pes cun sa ‘freccia’.

Una ’orta setzidu, s’abbaidat su mouse chentza lu tocare, comente chi siat in bidea de lu lassare istare. Ma, totinduna, li ‘etat lestru ambas manos e astringhet pius forte chi podet… nudda.

Antzis, si est possibile, peus de prima.

Totoia ilgiuchende s’istelzu in coghina, intendet frastimos chi fit dae meda chentza los intendere, dae cando su maridu, primu de si comporare sa vetura, domaiat sos ainos in s’ortu ’e segus.

Pedru si ’etat un’atera tatza de ’inu e si setzit pius atesu e achizadu s’abbaidat su computer. Est ancora comente l’at lassadu Frantziscu e dae cue non resessit a si movere.

Chi siat guastu!” Pensat, “Ma comente, si cuddu lu faghiat movere comente cheriat issu. Cheret narrere chi so deo chi non bi so bonu. Podet essere ma, chi isca deo, compare Bachis non s’est mai lamentadu. E issu it’est, pius inteligente de a mie ? Ma mancu pro buglia, si bi resessit issu bi resesso deo puru.

Si nde pesat e si torrat a setzere in sa cadrea adenanti su computer.

Totoia, cando s’in cras si nde pesat l’agatat gai, mortu ’e sonnu e gherrende ancora cun cussu chi oramai est diventadu unu nemigu de ’inchere o distruere.

Pedru paret abberu a malu puntu: sas manigas de su ’entone pijadas subra su cuidu, unu fiascu boidu suta sa banca, sas manos a tremida, sos ojos rujos che fogu e cun sos pilos de conca chi paret chi b’epan gherradu duos groddes famidos.

Totoia, chentza narrer nudda, torrat a coghina e dae sa credentza nde falat sa gafetera manna.

Finidu de la garrigare, atzendet su furreddu e giamat a Pedru nendeli de atzendere su fogu.

Pedru, bintradu in coghina, si setzit e isetat chi nde pighet su gafè.

Poi chi nd’at leadu duas cichereddas, faghet su fogu e narat a Totoia: “So andende a iscannare un’anzone, lu faghimos arrustu pro s’ora de ’ustare. Tue, a cando a sas noe, giama su chi nos at bendidu su computer, telefona a domo sua chi oe est dominiga, e li naras chi ’atat un’ateru mouse puite su chi nos at dadu est guastu.

E chentza narrer ateru chi ’essit andende a bochire su poberu anzone, chi neghe non tenet e pius pagu ancora ischit de informatica.

Totoia bintrat in s’aposentu inue est su computer, bidet chi est atzesu ma sempre cun sa matessi figura in su monitor comente l’at lassadu Frantziscu su sero innanti.

L’apo nada deo chi ch’essiat male.” Pensat, setzindesi cun s’idea de bi proare issa.

Comare Farora est dae meda chi li narat de sas retzetas de coghina chi agatat in internet, e già s’idet. Su maridu est rassu che porcu mannale dae cando li coghet tota cussa cosa ’ona.

Si girat pro leare su mouse comente aiat bidu faghere ma, pro cantu lu chirchet, su mouse non b’est.

Non b’est subra sa banca, non b’est suta, su mouse no est in logu.

A ora de sas deghe e mesa, arrivit Frantziscu e saludada sa femina preguntat inue siat su maridu.

Fala a magasinu, l’agatas inie iscolzende un’anzone ca creo chi ti chelfat a bustare.

Frantziscu falat a magasinu e già primu de ’intrare intendet calicunu sorroscende. Aberit sa janna e ammuntadu cun unu capoto ’etzu, agatat a Pedru, drommidu.

S’anzone ispeddadu est in su gantzu, isgutiende.

E apicadu, in su filuverru a pagu tretu, Franziscu bidet su matimine e in mesu, tra sa fressura e sa pedde insambenada, b’est su mouse, isperradu a resorza e bene pistu cun su marteddu.

Franco Piga su 26 de ’ennalzu 2012

Custu contu de Franco Piga de Romana at leadu una signalatzione in su premiu de contadura de Suni  austu 2012

Profilo biografico di Franco Piga in www.luigiladu.it con altri racconti. Vedi anche il sito di www.francopiga.it/

LASCIA UN COMMENTO

RSS Sottoscrivi.