Categoria : versos in limba

In custa notte ‘e lucore de Antoni Brundu de Orane a contivizu de Domitilla Mannu

 

In custa notte ‘e lucore
pàsida tunda e fozida,
drinnin in s’àghera nida
battor corfos a tenore.

 

Cando s’alenu ‘e sa luna
su chelu ‘e prata ingalenat,
s’anima a bellu m’illenat
allughende a una a una
lantieddas de fortuna
chi si pasan che lentore
in sas laras chi s’amore
basan a bolu, cantende
ballos ch’ ‘ido lampizende
in custa notte ‘e lucore.

Bundat bantzicos de undas
su ribu ‘e abba a “bimbois”
cando s’abbizat de nois
infundende sas ispundas
ube sos chizos affundas
ispijendeti dechida
in sa maretta fuida
chi ti chinghet chin su belu
de sa bòveda ‘e su chelu
pàsida tunda e fozida.

Fintzas sa frina est chieta
in custa durche maghia:
paret tottu poesia….
Eo mi parjo poeta….
E non b’at rima segreta
chi non t’inchendat de bida:
sa natura est totta ischida
pro rispondere a cunsonu
a cussos basos ch’a tonu
drinnin in s’àghera nida.

Bim-ba.bim-ba-bim-ba-bò!
Le-le-le.lle-le-le-lè!
Custa dantza ch’est pro te’
chin su coro ti la do.
Teso’, balla! Ajò! Ajò!
Ch’est s’isteddache in fiore:
sos isteddos in calore
m’accumpanzan in su cantu
iscudende in cust’ispantu
battor corfos a tenore.

Premio speciale Luigino Cossu 2012 Trinità D’ Agultu

Profilo biografico e numerose altre liriche in www.luigiladu.it

LASCIA UN COMMENTO

RSS Sottoscrivi.