Accademia sarda di storia di cultura e di lingua

Sa cara tua, sola.

Chircande-ti sos ojos
in làntias de luna
mi che colan sas oras
turmentadas.
Sa cara tua, sola,
miro in sas pupìas
de donzi criadura, anima mia,
in su rundare nostru sena fine.
Ando in cherta ‘e s’accisu
a cudd’ala ‘e sos montes
orulados de lughe,
cando sos rajos d’oro
de unu sole amigu
si dan sa manu in cantigos galanos.
S’alenu si mestùrat
a s’abbolòtu de custa prenèta
chi m’istontònat dira.
Est cuncordu deghìle
sa ‘oghe ‘e sos puzones
chi brincat currellèra
dae rosa a viola
inter sas dudas de su ‘enidore.
Sulat su lussurzesu,
prus forte de s’ispera,
beninde dae logos de dolore,
isbàttulat crudele
a una ferta galu sambenosa.
Ma deo paro fronte
a sas ansiedàdes.
Si puru tima s’urtima traschia,
cando su chelu s’isgarrat su coro
e riet piedosu
ispoporande sas nues de dolu.

Eliano Cau

Setzione versos isoltos III prèmiu ex aequo