Sa risposta de sa luna a Antonello Bazzu di Anghelu de sa Niéra
Sa luna a Antoni Bazzu
No, no l’ischis, Antoni,
deo no mi nde rio
de su tempus
ch’ ap’a girare
Ca su Segnore soberanu
at postu a totu
lacanas de tempus
e de logu!
Sas istellas
chi no atopan sa note
gia bi sunt,
si puru no las bides
cun sos ojos,
si cuant, Antoni,
pro bugliare cun tegus
chi mirende ses su chelu.
No, no b’at
dies lenas
chi no torrant pius,
in sa memoria
tua est su tempus,
ma fora de a tie
no b’at tempus
ma totu est frimmu
comente frimmu est Deus
No, no b’est Antoni meu,
su panta rei,
frimmu est solu s’esser!
Totu s’ateru est ingannu!
Zertu de a issa
ti mancat sa ucca
e su respiru,
sos ojos e i sa cara,
ca issa est passada
currende
che.i sa lughe
de su sole!
Issa, Antoni meu,
est solu una chimera
che basu perdidu
chi mandas a s’aera!
