Mutos cantados dae tiu Pedru Brundu, a sa chiterra Tigelliu Mannu – a cura di Domitilla Mannu

Cantadore e sonadore a chiterra

Custos mutos los  cantaiant in sas biddas de s’Anglona,  mi  sunt torrados  a mente  ammentos  de pitzinnia, cando babbu , a s’ispissa, recuiat a domo impare a carchi amigu a  cantare a chiterra.  Unu de custos amigos fit tiu Pedru Brundu, un’omine bonu e geniosu , apassionadu de cantigu, faeddaiat e cantaiat in logudoresu e in gadduresu.   M’ammento chi  cantaiat cun boghe atonada e piena de sentidu “ putajola chi no tinni,/ no la trata putadori,/ candu è calatu lu soli/ candu è ora d’andacinni./  Ancora sei filugnana comu candu eri minori,/ ancora sei furacori comu candu eri aggjana”/  o puru “Suspiri di lu me cori /in cambiu miu andeti,/ e fideli visiteti/ l’unicu oggjetu d’amori”/.  Custos mutos sunt una parte de sos chi  tiu Pedru at lassadu iscritos, e su fizu Nino mi los at dados pro nde curregire carchi paraula male iscrita.  Los imbio a Academia ca so segura chi ant a èssere pretziados.

Sa banda musicale

la sunt preparende

pro fagher sa sonada,

custu primu signale

a tie lu so fatende

isculta rosa amada.

 

 

Unu locomotore

s’est pesadu a bolare

altu cantu una nue,

si m’amaias tue

cantu nde so cuntentu

de ti poder amare.

 

 

 

Sant’Anna e santa Giara

sunt  in chelu gioghende

cun – d- unu arantzu tundu,

mi cherio basende

sas tuas bellas laras

cantu durat su mundu.

 

 

Una mata de atentu

la bido ogni die

totu in colore de oro,

fat’apo un’aposentu

pro nche pònnere a tie

intro su meu coro.

 

 

Un’ispilla un’ispilla

ponzo in sa revoltella

pronta a isparare,

acolla milla milla

cudda giovana bella

benzende a m’abbratzare.

 

 

Foto di Matteo Tedde

Si s’ispannat s’aera

sa luna in isplendore

sa note paret die,

intro de istasera

ti dichiaro amore

si cheres bene a mie.

 

 

campidanesa

Una campidanesa

m’est passada in carrela

bendende canistreddas,

rica mia bandela

non ti restes ofesa

proite non mi faeddas.

 

 

Foto di Mario Unali

Intrende in Tzaramonte

bi current duos rios

sunt  tres cambas de mare,

cantu mi durant bios

sos ojos de su fronte

mai t’apo a lassare.

 

 

S’aeroplanu nou

s’est pesadu a bolare

altu cantu una nue,

mi cherio corcare

cando bi ses tue

in su letinu tou.

 

 

Un’abbamanu nou

ti do a samunare

in s’abba de sos rios,

cherio imprenetare

intro su coro tou

sos pessamentos mios.

 

 

 

Una fisonomia

m’est bènnida a mente

chi m’ant nomenadu,

a tie solu ebbia

amore eternamente

apo dichiaradu.

 

 

Maria pilos d’oro

si ch’est bettada in mare

a piscare murena

sempere so unu coro

si mi cheres amare

mancari in terra anzena.

 

Sos caddos in s’arzola

currint a s’isfrenada

ca b’est su truvadore,

dami una mirada

cando t’intopo sola

in signale de amore.

 

 

Ite bellu fiore

est totu coloridu

in mesu est abenadu,

cantu est bellu s’amore

massimu si est furadu

est pius saboridu.

 

 

 

 

 

 

 

 

 

 

Commenti

  1. Un grazie dal cuore per l’inizio della ripresa di collaborazione di Domitilla. Ci sei mancata e ti vogliamo tra noi.
    Ange de Clermont

    scriptor
    Luglio 30th, 2011
RSS Sottoscrivi.