Poesias de sos minores a cura di Domitilla Mannu
Sa batulina mia
Cando cherides barigare
un’iscuta de ora in allegria,
giamade sa batulina mia.
Si narat che una printzipessa;
su pilu est nieddu, longu e calcu,
sos ojos paret de oro;
cando si nche drommit
paret una reina
e cando est famida
si girat che una sùrvile.
Ischit murrunzare.
Est curiosedda meda.
Ma no est una printzipessa,
est Sissi sa batulina mia.
Lucia Merella de s’Iscola Media de Fiolinas
S’elighe
Bos faeddo, cun dolu mannu
e cun su coro pienu de afannu,
de s’elighe de Sa Serra,
chi dae tempus a su bentu li fit fatende gherra.
Mi frimmaia a l’ammirare
cuss’arvure seculare, sempre birde e fozida,
chi faghiat umbra dae una vida.
Como totu est giambadu
ca su male non l’at rispetadu:
pianu pianu s’est sicadu
e, a dolu mannu nde l’ant segadu.
Tania Piga de s’Iscola Media de Fiolinas
