Categoria : letteratura sarda

“Miallina, Gildo e Thau” di Giovanna Elies

Miallina e Gildo, como, sun duos amorados dae attesu; issa inoghe in logos nostros, isse in Rerat, unu logu de addae in su cale si vivit no solu divessamente dae nois ma fattende aterunas faches.
Issa est assignoriccada mendosa, difattisi  ‘istat in s’ultimu pianu ( su ‘e battoro) de su palattu insoro, comente chi esserat  una prenda de familia.
Sos mazores no l’han fatta cojuare  pro no la toccare, timende chi l’esseren guasta, ca fuit bellitta, ricca, bene cumbinada de ogni manera.
Pagas amigantzias, pagos recreos in bidda, biazos medas, peri su mundu, sempre cun babbu e mama, chi la fuin pesende comente fiore in pastera.
Ingasi, pro Miallina, si che fuin bolende sos annos mezus: granda, ricca, bene educada ma a sa sola.
Totu sos  omines chi l’haian chilcada no fuin in gradu sou, issa fuit de bonu manizu e istaiat a sas detzisiones de sos mazores.
A unu Nadale, accò sos suos li regalein unu televisore cun su cale podiat abaidare  totu su mundu e unu cellulare cun su cale podiat faeddare cun cale esserat istadu, in su logu pius lontanu dae idda sua.
Difattisi, unu sero, in su televisore accò una fregura de òmine, grasciosu e galanu: “eo so Gildo e tue chie ses?”.
Miallina , mesu assucconada, pessende a sos contados antigos de animas de sos mortos,  diventeit ruja che cogone e assucconada mal’e peus chi esserat bidu su dimoniu.
“Eo so Miallina -rispondeit tremulende- e  a tie chie t’hat dadu su pemmissu de mi distrubbare?”
“Diciosa –li narat  Gildo- tue sutta sas nues ses sa chi mi piaghet de pius: minoredda, rassitta, bene educada, rispettosa. No ischis fagher nudda, ma tantu inoghe in Rerat s’itte fagher già est pagu!”
Miallina -“Inue istas tue?
Gildo- “Peri sas nues, antzis, subra sas nues, diciosa, in dunu logu de sònnios”.
Miallina, pro no si fagher mandigare su calveddu dae sa solitudine, comintzeit a bi faeddare, a si cunfidare,  comente chi esseret istadu  unu de sas biddas de affaca e, cando no compariat a s’ora giusta, li eniat su nervosu.
Cun s’andare de su tempus, Gildo comintzeit a diventare sempre pius impoltante pro Miallina e comintzeit a detzidire, comente chi esset istadu  su maridu.
In pagos meses  Miallina cambieit vogliolu e  faghiat totu su chi Gildo li naraiat.
In peristantu li mandeit unu robot tuttofare, Thau de nomene, e issa  faghiat  ancora pius sa segnora: innamorada e bene tenta comente unu gingillu.
Unu sero, Gildo li antitzipeit chi s’incrasa li mandaiat unu aviotassi, ca la cherian connoschere sos suos in Rerat, chi s’esserat tenta pronta.
Miallina, no ischiat itte podiat essere cuss’aviotassi,  fuit segura de no resessire andare a logu. Ma Gildo, connoschendela, no la cheriat   lassare in pessamentu e detzideit de sighire  sa fatta “in diretta”.
Difattisi, s’ incrasa, accollu in su monitor:
Gildo – mòrigadi Miallina, Thau ha ciamadu s’aviotassi, pone un’oretta e ti nde lu ides in domo. Camina a ti remunire. Si no m’ìmbaglio, sa carreledda si frimmada a costa a sa ventana.
Miallina – iscù, mi ses iscasseddende cun custa carreledda. Ti l’appo nadu milli oltas chi custu de ch’essire peri sas nues no mi piaghet meda, mancu nudda! Hazis  dogni bene de Deu e  no hazis unu tassi cun battor rodas?!
Gildo – De tzeltu no pro ‘enner ainoghe!!!
Miallina – Ma, a si podet ischire in cale contonada vives?
Gildo- Contonada?! Itte diat essere una contonada?
Miallina – Lassa peldere, lassami istare, faghemi fagher  sas cosas giusta. Ma, zigarros si nd’agatan in logu tou?
Gildo – Zigarros!? E itte sunu e  pro chie?
Miallina – Pro babbu, ello mi nde torro chene nudda!
Gildo – No ses macu ‘ennida!
Miallina – Como molla, mi devo cumpanigare sos pilos e tzaccare cussa lamiera chi m’hat battidu Thau.
Gildo – Lamiera? Sas zovanas de inoghe  la ighen totu.
Miallina – Agontzas sunu!
Gildo – Pisaprestu, ciama Thau, isse ti podet aggiuare.
Miallina – Isse ch’est restadu  cun su macchinariu pro su piuere, in su ripostigliu.
Gildo – Miallì, no fattas cussu, bogandelu s’iscuru.

Miallina – iscurigheddu; iscuros sezis totos duos! Como, si no mi ch’essis dae custu monitor iffalcio totu. Cantepennò, cagliadi mudu, abbaida e ligadi sa limba.
In peristantu, Miallina faghet unu suspiru de assentu e si ponet  a si mezorare, cundierrende cun Thau, chi liberadu dae Gildo cheret ponner francas in dogni cosa. “Nostrasegnora mia, già l’appo fatta sinchesa, dae duos no nd’essit fora unu ‘onu. Thau (a boghes) recui ainoghe, accontzami sos pilos, pone su tintieddu in sas ugnas, e aggiuami a tzaccare  sa lamiera chi cussu macacu de Gildo m’hat mandadu”. Gildo ma cando mai non podias mandare una filippina o una rumena, finas una niedda fudi andada ‘ene invece de custa macchina ijimprotta, chi no ischit mancu inue est fichida!”
Gildo – Est su teraccu nostru, poi no isco itte sunu sas filippinas e mancu sas rumenas!
Miallina – Assumancu! Faghemi su piaghere dimanda a Thau inue hat cuadu su chi mi servit.
Gildo- ma.. Thau inue che cuas su chi servit a custa bella segnora?
Maillina – thauadu ses e bene, cussu morottulu de ciaos no est bonu a nudda. Che fuit isserradu in sa lavanderia e como ‘nd’est torra in mesu de pes.
Gildo- Ses a s’ultimu pienu de Selene!!!
Miallina- de chie?!
Gildo- comente de chie, de Selene, bois la ciamades luna.
Mialluna- a s’ultimu pienu de sa luna s’es tue; bessinde dae cussu monitor e beni ainoghe.
Gildo-muaroc.
Miallina- torrende bi ses a narrer cussas peraulas a s’imbesse. Arratza de òmine! Tue cheres  istudiadu pro ti cumprendere. Comente si siat, Thau fuit presu e como ‘nd’est fora. Innoramascara, cosa de ti cuare nudda est?
Gildo- sessandela e congrui, ca ti so mandende a ti leare.
Miallina- chi ti che lene a s’ispitziu, òmine de ‘edrina!
Thau- ajò, mòriga, Gildo t’est aisettende. Essi a bider si resesso a ti  tzaccare custa lamiera!?
Miallina- itte asa nadu…? Lamiera?
Thau- ello itt’est si no lamiera, ma in su  Rerat, inue si faghe fogu Gildo, sun de moda. Bellabè, faghedi istrinta, ca si no custa ‘estimenta ti raffiat sa pedde. Dai, aggiua, mantene s’alènu… tzaccada. Nostrsegnoramia, no cheres abbaidada. Allò chi ti ponzo sos bellettos e ingasi pares pronta pro fagher findigu.
Miallina- Thau, faeddas comente una pessone.  Ello  daghi a Dolce e Gabbana non los connoschen in cussu Rerat
Thau- in chilca de Dolce e Gabbana sunu, issos bestin gai. E faghe attenzione a no t’abbratzare a Gildo, nossichi puru ti fattet s’iscossa.
Miallina- Thau, ello tue de cales ses?
Thau- eo so de inie, ma a fortza de istare cun tegus mi so abetuende a inoghe e, si m’andat bene su chi ‘itto in manu, no bi torro. Ma como sessa su faeddare, s’aviotassi est arrivennde, bae e torra ca in cussu pianeta a mandigare  cosa metzana pius pagu b’istas e mezus est.
Miallina- no ti creia. Tando, agabbami a sistemare custa camija de foltza, accontzami sos pilos, ponemi sos bellettos e siat comente si siat.
Thau- ma.. de abberu pessas chi Gildo bi ponzat fregura! Pius malagontza bi andas e pius l’às a piàghere..
Miallina- unu mezus de s’àteru.
Gildo- Miallina, mòrigadi luego; no istes a iscultare sas ciancias de Thau; a bois in Terra  piaghet a mandigare de fronte a su mare. Nois, inoghe, mandigamus de fronte a sa Terra cun sa tiazza fatta de isteddittos, às a bidere itte gosa bella, itte gosu.
Thau- arratza de gosu. Cun sos taulinos in mesu a sa renalza, cun d’unu suffogamentu de aeras e cun sa timòria chi passet calchi crastu o calchi isteddu guastede sa festa..
Miallina- de abberu?
Thau- ..ello no!
Miallina-    e tando… eo no bi ando..
Thau- troppo tardi, accò s’aviotassi accostende a sa ventana; già t’isettan , ma est mezus a pigare.
Miallina- isculta thaighe’ ma… ite nde naras si cando torro no che andamus a sa pitzeria de  s’Alighera e no’ mandigamus una pitza peromine de cussas a metro?
Thau- como ‘ola, daghi torras nde faeddamus..
Gildo- mi raccumando: sedi in su sedìle,  ligadi ‘ene, no faeddes cun s’isciafferro e camina a benner ainoghe. Antzis no, innanti de totu serra su monitor, ca si no mi cundennas a restare in Terra.
Thau- itte peccadu diat essere, indetzisu si a istudare o lassare  su monitor atzesu, inciaitende pro vida  cuddu pòberu Gildo.

Giuanna d’Elies

 

 

 

 

LASCIA UN COMMENTO

RSS Sottoscrivi.