Categoria : versos in limba

“Peraulas” de Maria Sale

Maria Sale

Sentores de faeddu
in bena e neuddu intrados
a bentu de sole e traschìas
…e peraulas accabidadas
dae farfaruzas frundidas.

Peraulas isgutadas
betende isgramos debadas,
apedradas
in laras serradas.
Peraulas punghidoras
tra rosas de maju,
fentomadas addaju
pro las fagher diciosas.
Fuidas,
pro no esser mai nadas
e peraulas giaitadas
pro esser malaitas.
Peraulas chen’impreu
de tempus isfidiadu
su chi nd’at suterradu
alenu sende ‘iu.

Ai, birgonza ‘e su mundu,
a tenner cumassada
madrija de chivarzu
cun fiagu de iscobile
in ruos e mudejarzu!
Peraula de rejone
a tardìu cumpresa,
peraula suspesa
in su dare e leare
peraula pro gagliare.
Peraula de prommissa,
a fune de fumu imbrigliada!
…E nois, piscòa piscòa,
cun s’anima tapulada,
currende ardias debadas.
Posada 2016 Menzione d’onore

LASCIA UN COMMENTO

RSS Sottoscrivi.