Categoria : recensioni

“Tramas de filu” di Laura Ruiu, recensione di Domitilla Mannu

Laura Ruiu,Tramas de filu. Il vestiario popolare di Osilo,  Domus de Janas,  Selargius, 2010 pp, 224.

   A pustis de un’istùdiu aprufundidu de sos documentos antigos, comintzende dae sos tzinnos de befe pro sos sardos, fatos in antigòriu dae Cicerone “ mastrucati latrunculi ” e dae Varrone e Tito Livio “ mastrucati e pelliti “ e cun sos primos istòricos sardos, Sigismondo Arquer e Giovanni Francesco Fara in su sèculu su de XVI, s’anàlisi de sos documentos sighit cun sas testimonias pius de importu, de sos “ viagiadores ” italianos e europeos chi pro motivos divessos visiteint sa Sardigna in sos sèculos dae su XVII a su XIX e cun sos atos de sos notàrios e sas fontes iconograficas, chene ismentigare sas testimonias, de fèminas e òmines de Osile. Sa chirca de totu su chi pertocat s’argumentu Laura Ruju, osilesa issa etotu, l’at fata a primore, lu narat Paulu Pillonca in s’istèrrida, cun peràulas de sentidu profundu e de ammiru.

Sas descritziones de totu sas bestimentas sunt giaras e pretzisas e sunt abberu de importu sas notiscias de sas mastras recramadoras e cosidoras chi in Osile ant trabagliadu e fatu iscola in su tempus e de sas cales si nde mantenet alu s’ammentu . Su lìberu est irrichidu dae un’aparatu de unas otanta fotografias de imagines chi s’agatant in lìberos, regoltas, cartulinas, pinturas e medas àteras de zente osilesa dae sos primos de su noighentos fintzas a sos annos chimbanta. Non mancant sas fotografias de bestimentas de unos cantos logos de Ispagna, dae s’ Andalusia a sa Navarra e a sa Catalunia a testimonia de cantos assimizos e currispundèntzias bi sient intre sas duas maneras de bestire e de sos cales s’autora nde faghet s’anàlisi.

Su lìberu est istadu bortadu in sardu dae Immacolata Manca, ghiada dae s’Istitutu Bellieni de Tàtari.

Su sindigu Nanni Manca in sa presentada de su lìberu, espressat totu su reconnoschimentu  chi s’autora, de seguru, si meressit e si nde piaghet e tenet mannu comente est giustu e deghet.

Est unu lìberu de lègere e de signalare a chie nde cheret ischire de pius subra de custu argumentu.

Commenti

  1. Grazie Domitilla, è davvero un bel excursus; un nuovo pezzo si aggiunge al faticoso recupero del passato.

    giovanna Elies
    Dicembre 4th, 2012
RSS Sottoscrivi.