Categoria : versos in limba

S’ischiazis o frades di Antoneddu Bazzu de Tàtari a cura di Domitilla Mannu

Custa poesia at leadu su de 4 premios ex aequo in Otieri 2011 in sa setzione poesia sarda inedita ” Antoni Sanna”

…andat lenu su sero,
sumende sàmbene,
a truncare sas trobeas
de sa notte.

Drommit sa ‘idda
chen’ischire, bisende
folas crèttidas beras.

In sos chercos muinat su ‘entu
e i sa luna riet chena sonnu
ilgiarinde riu
e muros burdos
in sa tanca.

Deris at faeddadu
unu sàbiu pilicanu
e su ‘entu at ispérdidu
sas peràulas suas
de lentore.
Cras
àteras dies
chen’ispera!
A cando s’interru
de sa rejone?

E duncas sa notte
at a esser pro semper?

S’ischiazis o frades
cantas isperas istrumadas
dae sa duda ‘e su seru
m’attruman su coro!
E cantu
e cantu cun s’isperu e s’indellettu,
“malgré la merde”  ( 1)
galu ispero!

primu de ‘ennarzu de su 2011

(1)”Malgré la merde, je crois ” Con questo ottimistico sberleffo Maurice Bérjart uno dei maggiori commediografi del XX secolo chiudeva una sua intervista sul pessimismo.

Commenti sono sospesi.

RSS Sottoscrivi.