Categoria : cultura, lingua/limba

Aprovadu dae sa Giunta regionale su Pranu triennale pro sa limba sarda – de Mariu Carvone

Sa Giunta Regionale, a proposta de s’assessore de s’ Istrutzione Pùblica, Benes Culturales , Informatzione, Ispetàculu e Isport, Sergio Milia (in sa fotografia), at abertu s’àidu a su Pranu Triennale de sos interventos 2011-2013, pro su promovimentu e avvaloramentu de sa cultura e de sa limba de sa Sardigna”.

Est su chi si leghet in una nota de sa Regione Sardigna. “In su Pranu nou si puntat meda a s’iscola e a sa famìlia, in prus de sos mèdias, pro sa comunicatzione, pro su promovimentu de s’informatzione in limba sarda. In prus b’at a èssere un’agiudu a sos prèmios de poesia, a su sardu curriculare in sas iscolas, a sos isportellos linguìsticos. Interventos chi punnant a sa creatzione de òperas didàticas, tradutzione de òperas de valore e investimentos pro sas universidades. A pàrrere de s’assessore Milia fiat importante, intesu s’Osservatòriu regionale pro sa cultura e sa limba sarda, a mandare a dae in antis unu progetu articuladu chi aeret dadu unu prosighimentu a su chi s’est istabilidu in sa “Cunferèntzia Regionale de sa Limba Sarda” fata de reghente in Fonne. Su Pranu triennale est un’istrumentu de programatzione subra de sos temas de s’identidade e de sa limba regionale cun su cale si cheret realizare una difusione ecuilibrada, in su territòriu regionale, de sas initziativas in favore de sa cultura e de sa limba de sos sardos istimulende s’elaboratzione e s’atuatzione de progetos e programas de isperimentatzione. Cun istrumentos normativos prus adeguados e funtzionales b’at a èssere una distintzione operativa crara intre limba e cultura sarda, vardende unos cantos progetos in àmbitu culturale de interessu e importu particulares. Su Pranu triennale de sos interventos de promovimentu e avvaloramentu de sa cultura e limba sarda 2011-2013 l’ant a presentare in su Cussìgiu Regionale, pro otènnere su pàrrere de sa Cummissione cunsiliare competente, e a sa Cunferèntzia Permanente Regione-Entes locales. In mesu de sos progetos, finas sos chi pertocant interventos in favore de sa limba sarda in foras de sa Sardigna e in foras de s’Istadu, s’isportellu linguìsticu regionale, s’Atlante linguìsticu multimediale de sa Sardigna, cun su promovimentu de totu sas variedades linguìsticas de sa Sardigna, e s’otenimentu de sos deretos pro su web de òperas de tradutzione de clàssicos de sa literadura internatzionale in sardu, dae s’italianu o dae àteras limbas e de òperas didàticas pro s’imparòngiu de sa limba sarda”.

Commenti

  1. So unu “Dirigente Scolastico”. Totu custas cosas andant bene meda. Pro me, però, bisonzat de punnare, subra de totu, a ponere sa limba e sa cultura sarda comente una materia obbligada in sas iscolas. Finas a como est totu lassadu a sa bona voluntade de presides e mastros de iscola. Fatende a custa manera, invece, si dat a sos pitzinnos e sas familias issoro unu signale pretzizu chi est chi su sardu est importante meda. Chie de dovere, poi, est costrintu a ammanitzare sos mastros de iscola a imparare sa materia noa a sos iscolanos. Finas a como, nois faghimus progettos cun sas leges regionales n.26/97 e n.3/09 e cun cussa natzionle n. 482/99. Sos progetos fatos cun sa n.3/09 durant 24 chidas e andant puru bene ca podes leare unu mastru dae fora chi nde ischit. Su fatu est chi, a s’ispissa, sunt isulados, imbarant incue e non sighent: non b’est, infatis, sa garantzia de essere torra finantziados. Sos progetos fatos cun sas ateras duas leges, pro aeret su dinari, si devent faghere cun ateras iscolas, chi est puru giustu,ma cando durant pius de un annu si devet isperare chi sos mastros imbarent in ue sunt, chi est una cosa diffitzile cando sunt iscolas minores.

    A nos bidere sanos
    Gianni Marras

    Gianni Marras
    Maggio 25th, 2011
RSS Sottoscrivi.