Categoria : eventi culturali

Alessandro Fais di Nino Fois

Eo non so e ne unu preigadore e ne unu giornalista e, pius pagu ancora, unu politicu. So ebbia un’ amantiosu de su cantu sardu, un’amantiosu de sas cosas sardas, cando sun bellas, cando sun sanas, cando si faghen ammirare.So amantiosu che a bois de sas cosas chi mi ispantan, chi mi faghen meledare e chi m’abberin su coro a sa zente de totu su mundu cant’est mannu.

E, comente s’arvure s’atacat a sa terra pro dare naes, fozas, fiores e frutos, gai eo, e, sena duda peruna totu bois chi sezis inoghe, m’ataco a sa terra mia cun sas raighinas mias antigorias chi sun sas raighinas sardas, sas pius devucas chi potat aer unu sardu che a mie e che a bois, amigos istimados.

Semus bénnidos a pare in custu logu maravizosu de s’Isula nostra, in custu logu antigu chi at bidu festas e peleas sut’a-i custa arcada de chelu beneita pro nos gosare pagas oras aiscultende su cantu sardu soberanu chi nos che pigat a sos isteddos chi istan pius acurtzu a Deus.

Ma s’abboju de oe in s’abbadìa antiga de Nostra Segnora de Corte at una balentìa pius manna de sa chi podet aer una gara de cantadores a chiterra.

S’abboju de oe nos giamat a un’obbrìgu chi est unu piaghere mannu: su de fagher festa a unu fizu de sa terra nostra, chi nos at dadu onore e bantu cun sa boghe sua melodiosa de rusignolu, cun sa seriedade, sa professionalidade e-i s’impignu.

Est una festa chi est unu granzéu chi su Comitadu de Nostra Segnora de Corte e-i s’Amministratzione comunale de Sindia nos at dadu sa possibilidade de fagher a Alessandro Fais, Cantadore sindiesu, òmine sardu, amigu coriale e frade.

Alessandro Fais est inoghe a coro abbertu a lu pienare de sa riconnoschentzia nostra comente puru isse nos at irrichidu medas bias cun su cantu sardu intrepetadu cun sa boghe maravizosa chi Deus l’at dadu e chi isse at impitadu cun sabidorìa.

Alessandro Fais est unu sindiesu de su trintases, un’òmine che a totu sos ateros, tribagliadore artesanu, babbu de familia cun s’anima ispalta che bandela a totu sos bentos.

Dae sende minore at dadu atintzione a s’arte de su cantu e, cando andaiat a sos cantadores imbaraiat acurtzu a su palcu pro non perder una nota ebbia de cussa melodia chi che lu pigaiat a chelu cun alas lébias de ambàghe.

Mi paret de lu bider piseddu, a conca in altu, a risu in laras e a orijas paradas aiscultende sos versos de Paulu Mossa:

<<Cantas tristas memorias m’ischidas

in s’atonita mente, o baddemala…>>

cantados a sa nuoresa o, in re, sos versos de Sa domo de campagna:

<<Eo bos isetaia

avantzade, non timedas,

sas benennidas siedas

rundinas a domo mia >>

E surziat Alessandro Fais, sa musicalidade de sas peraulas e-i sa melodia de su cantu acumpanzadu dae sas notas de sa chiterra.

Totu surziat intro de su coro sou piseddu, totu costoende che siddàdu, atìvu che vulcanu a fogu intro. E totu su chi aiat sutu su cantadore sindiesu nostru, nde lu brotaiat, fatu a criadura sua in s’intrepetatzione sua etotu, sena furare nudda a niunu ma, sempremmai, irrichende su talentu sou cun s’imparu chi leaiat dae sos ateros chi teniat in contu de mastros.

Custa est sabidorìa chi fràigat cultura chi s’abberit a sa zente chi si b’acortziat.

Eàllu in sos palcos de Sardigna!

Iscomintzat in su ’60 a costazu de sos mezus cantadores:Nenardu Cabitza, Mario Scanu, Luiginu Cossu, Antoni Desole, Antoni Nuvoli, Zuseppe Chelo, Tonino Canu, Frantziscu Falchi, Cubeddu, Denanni, Franco Demuru, Firinaiu, Lilliu, Antoni Meloni e àteros meda chi si perden in su contu ma non si perden in s’ammentu.

E cuncurret puru a Otieri pro su Premiu “Usignolo della Sardegna” e si che leat su segundu premiu duas bias, in su 1965 e in su 1966.

Binchet su Primu Premiu in Cagliari pro su Folcklore Sardu , su Primu Premiu in Tatari e, in su 1997, su PRIMU PREMIU in Otieri “L’USINOLO DELLA SARDEGNA”

Dae su 1962 at iscomintzadu a andare in estero a allebiare cun sa boghe de sa Sardigna sas piaes de sos disterrados nostros.

Eàllu in Belgio, in Frantza, in Germania, in Svitzera.

Barantaduas bias est andadu a che giugher s’ambasciada de sa Mama Terra nostra a sos chi sun peri su mundu a si balanzare unu mossu de pane!

Ancora no at cumpridu de su totu ca, puru si sena impignu de garas, li tocat de ispargher in s’aera sa boghe sua melodiosa.

E de cantu sardu già nd’amus bisonzu propiu pro nos allebiare sas piaes chi custu tempus nos dat in donzi modu e in donzi manera.

De cantu sardu ricu de bellesa e de arte chi làmpinat in tota sa Sardigna un’ambasciada de amore, de amistade e de allegria.

Chie si b’acortziat non podet fagher male ca s’afinat sos sentidos che-i sos cantadores chi lu produin.

Alessandro Fais est unu de custos: un’amabasciadore de bene a médiu de sa boghe melodiosa e de sas peraulas seberadas intro de cuddas chi custa Terra ispràminat che semen de fiores a su bentu.

E-i sas peraulas chi Alessandro cantat che chi esseren sas suas sun sas de sa disisperada chi l’at dadu, narat isse, unu preideru in Tzaramonte (tet esser su preideru – poeta, don Giommaria Dettori de Siligo) e chi naran gai:

” Sas penas de su coro so cantende

a tie chi ses bella e ses donosa,

finas sa luna in chelu pibiosa

istanote cun megus est bizende.

T’imploro cun dolore, lastimosa

sias de chie tantu ti est amende

pro chi sa note chi mi est pesu ancora

mi preparet in conca s’aurora.”

Ma, comente sos fiores chi donzunu at su colore sou, gai etotu sos artistas an su chi li dat personalidade.

Alessandro Fais podet aer su bantu de esser su mastru de su ballu sardu.

L’amus a intender istanote etotu cantende ballos sardos traditzionales e cumpònnidos dae isse matessi e nos at indilliriare a ballare e a fagher festa sut’a su chelu de Nostra Segnora de Corte, in Sindìa.

Commenti

  1. ti ringrazio de coro po cantu as descrittu supra s’istoria mia alessandro fais

    alessandro fais
    Settembre 27th, 2009

LASCIA UN COMMENTO

RSS Sottoscrivi.