Categoria : cultura

Dae s’ulva a sa losa di Nino Fois

 Istùdiu contivizadu dae Nino Fois

images-20 Sa vida de s’omine in Sardigna dae antigòriu fin’a unu seculu a-i como

 

Sa vida de s’òmine si partit in battor tempos:

1. Su tempus su de unu

Su de unu andat dae sa raidesa a su partu a su battizu a sa pitzinnia.

Sos sardos si tenent mannos de sa familia manna. Sos fizos sunt una grascia de Deus. “Chie nd’at unu non nd’at manc’unu” narat su dicciu.

    In biddas medas de sa Sardigna (Scano Montiferro e àteras medas ) sa fémina istóiga deviat battizare unu burdu pro benner ràida.

images14Sa fémina raida est una persone sacra. A unu bene de regulas igienicas e magicas devet ponner mente sa femina ràida e bi devent ponner afficcu sos chi cun issa vivint, comente maridu, fizos, sorres, frades, mama, babbu, parentes, amigos e connoschentes de su bighinadu e de totta sa bidda cant’est manna. De sa femina raida cherent accansados sos disizos o, si no est possibile, cheret chi issa si tocchet in cussas alas de su corpus chi andant cobertas a manera chi su disizu o sa gana(sa fromma de su chi sa femina ràida at disizadu) no essat a su piseddu in partes de su corpus chi si bident: cara, bratzos, manos ecc.

Sa femina ràida cheret chi no miret cosas, cristianos o animales feos.

Sa femina ràida non podet battijare fizu anzenu e ne podet fagher de distimonzu addenanti de sa Giustiscia.

Ateras cosas devet o non podet fagher sa femina ràida ma inoghe no nde fentomamus pro nde la truncare in curtzu.

Cando sa raidesa minettaiat de andare male (minaccia d’aborto), tando sa femina raida pediat a una femina antziana chi las aiat sas fortijas pro si las prender a chintu finas a s’illierare. Sa padrona de sas fortijas las daiat fattende cun sa ràida cambiu cambiu cun sa prenda pius pretziada chi aiat. Si poniant in terra siet sas fortijas e siet sa prenda e donzunu si leaiat su chi li toccaiat. Gai etottu si faghiat a sa torrada.

(Própiu che-i sos piseddos de sa pittzinnia mia chi, cando si cambiaiant calchi cosa, faghiant a “pon’in terra” )

In cabitta de lettu de sa pantolza ( o partorza) b’est sa mama, sa sogra e-i sa mastra de partu.

In tempos antigòrios sa pantolza s’illieraiat subra de un’istoja serente su foghile. In su matessi logu su cristianu, a betzu, congruiat s’esistentzia sua.

images-133In s’Isula nostra importantzia manna at su Battizu chi est una tzerimonia relizosa ma finas unu ritu de festa de domo.

A su Battizu leant parte no ebbia sos parentes e-i sos amigos custrintos e-i sos nonnos (Padrini), ma finas sos de su bighinadu e unu bellu fiottu de piseddos chi isettant sos dulches e-i sa confettura chi benit bettada a porfìa in carrela a sa torrada dae cheja.

Sa criadura a cheja che la giughet un’ajanedda de doighi o treighi annos e no est sa primma bolta chi su piseddu, a mannu, si cojuat propiamente cun sa chi l’at giuttu a battijare.

Sa prima piseddia est s’edade de sos nìnnidos e de su duru duru.

Sos nìnnidos, cantados dae sa mama, sa onnamanna, sa sorre pius mannitta, sa tia e atera zente, serviant a drommire sos piseddos minores. Su duru duru serviat a giogare sos piseddos cando fint ischidados o de malamore o inchietos. Custu, de sa pitzinnia, est finas su tempus de sos contos de foghile e de sos contos de giannile.Sa onnamanna o su onnumannu o sa mama, calchi tia o nonna, serente sa tziminea o a inghiriu de su foghile o de su brajeri,in s’ijerru, contaiant contos e contascias de fadas, de orcos e de res e reinas. In s’istadiale custos contos si contaiant in su giannile leende su friscu.

Sa piseddina restaiat ispantada aiscultende custos contos e-i sos pius minores medas bias si che drommiant puru.

Ma sa pitzinnia de sos sardos non fit fatta de contos e de contados e ne de nìnnidos e ne de duru duru ebbia. Lòmpidos sos sette o sos ott’annos sos piseddos de sa Terra Nostra comintzant a tribagliare: sas feminas in domo a aggiuare sa mama isbarratzende o ninnende sos fradigheddos o sas sorrigheddas pius minores e-i sos mascios comintzant a andare a campagna fatt’a su babbu.

A-i cussos tempos fit cosa manna cando unu piseddu masciu giompiat a sa tertza elementare. Sas piseddas fit raru chi ponzerant pe’ in iscola.

Sas criaduras fint allattadas a longu dae sas mamas o, si sa maam non podiat ca no aiat latte, dae sa mamatitta o tadaja o allattarza o tatta.

Sa criadura, medas bias si nd’istittaiat cando fit già andende sola ma su latte non lu lassaiat. Sighiat a mandigare su latte in donzi modu e in donzi manera e, sos fizos de sos pastores lu buffaiant derettu dae sa cannada, appena muntu o dae su labiolu. Sos piseddos de su pastore, su manzanu, a s’ora de s’intrada, fint sempre inghiriados a su labiolu e buscaiant de continu , o dae su babbu o dae sa mama o dae sos onnosmannos, su regottu friscu e-i su casu a giuntas intreas:

In sa familia sarda, finas sa pius pobera, non mancaiat mai su latte e ne su regottu e ne su casu o su butirru o su pizu. Finas s’iscatzofa si faghiat cun su pizu, in tempos barigados. Si faghiat su casufurriadu e-i sa matzafrissa e –i su mazzamurru. Su chi si produit dae su latte, comente casu, regottu, butirru e pizu,  si mandigaiat in donzi tempus e in in donzi manera: in pitzinnia, in gioventude e finas a betzesa.

Su casu si mandigaiat friscu, istajonadu e giompagadu; su regottu friscu o mùstiu.

Sos crabarzos mandigaiant casu e regottu bécchinu, sos pastores, casu e regottu erveghìnu e-i sos baccarzos, casu e regottu bàcchinu.

Sos massajos mandigaiant su chi produiant issos matessi cun su tribagliu insoro ma faghiant cambiu – cambiu cun sos pastores.

A sa pantorza, cando si illieraiat, non li mancaiat su brou de pudda.

Pro su Battizu si faghiat su pane e – i sos dulches adattos: pane arantzada, pistoccos, zarminos amarettes, guelfos e marigosos.

Sas féminas comintzaiant a imparare a fagher su pane e-i sos dulche dae sende minores. A deghe o a doighi annos sas piseddas, sa notte de sa suetta, si nde pesaiant a ora de sas tres de manzanu e, a costazu de sa zente manna ( mama, tia, onnamanna, sorrastra o bighina) intraiat a suigher, imparende, chida pro chida dae sas mannas.

  2. Su tempus su de duos

Su de duos est su tempus de sa gioventude, su tempus de s’ajanìa e de su còju.

Sos mascios affinant su tribagliu, guasi semper su de su babbu e-i sas feminas imparant a fagher sas pobiddas e approntant sa cojuanscia pro si cojuare (biancheria, ricamos, faunas de tesser ecc.)

images-143Custu est su tempus de sas serenadas. Su zovanu chi cheret una pisedda che li giughet sa serenada. A de notte sos amigos de s’amoradu , sutt’a su balcone de sa pisedda improvvisant una cantada a chiterra o sena chiterra, comente benit bene. Issa, sa pisedda, imbarat a parte de intro, sena si fagher bider.

A daghì finit sa serenada, calchi bolta su padronu de domo bessit a fora e bettat a buffare a sos piccioccos chi a pianu a pianu si l’avviant, donzunu a domo sua ca a sa fatt’e su die b’at de tuccare a campagna pro tribagliare.

Finas su còju fit unu ritu in Sardigna, chérfidu e ammanizadu dae sa mama e dae su babbu de sa femina chi a piaghere insoro seberaiant s’omine sena perunu parrer de sa fiza.

Medas bias fit sa trattadora sa chi presentaiat s’omine a sa familia de sa femina(babbu e mama ebbia).

Sa trattadora fit una femina (o omine, trattadore o paralimpu, comente narant in tzertos logos) geniosa chi poniat totu sas trassas suas pro cumbincher, cando bi nd’aiat bisonzu, sa parte de sa pisedda.

Su còju, in tempos barigados, fit una tzerimonia e una festa chi si faghiat in domo de sa femina. Si congruiat a de notte manna cun su trattamentu, sos regalos e, medas bias cun sos ballos.

S’incras sos cojuados noos a sa bessida de sa missa (su còju si faghiat in sàpadu) si faghiant su giru de sos parentes a dare a ischire su còju de sa notte innantis.

Sas bajanas, in custu tempus imparant a coghinare a fagher dulches e tottas sas fatzendas de domo. Imparant sempre aggiuende ca in sa Terra Nostra mastros derettos non bi nd’at. Sos piseddos, sient issos mascios o feminas imparant aggiuende e aggiuant imparende.

Cando una bajana andat a si cojuare, in Sardigna, est già una femina fatta.

Su mandigu de custu tempus est su mandigu de chie tribagliat meda, sena si frimmare totta die.

S’immulzu fit su chi avantzaiat dae sa chena e a bustare, si si mandigaiat in campagna, in tribagliu, bastaiat pane e casu, pane e regottu, pane e cariga o pane e chibudda o pane a s’asciutta.

 3. Su tempus su de tres

Su de tres est su tempus de s’affidu, de sa familia, de sa maduridade e de su tribagliu.

Sa mama in sa familia sarda est sa chi si leat su pius assuntu mannu in su pesare sos fizos. Su babbu pensat a tribagliare.

Amus a narrer a prim’e tottu chi sa familia si frommat cun s’affidu chi est una tzerimonia relizosa e una festa manna de allegria inter parentes e amigos.

S’affidu si faghet in sa cheja de appartenentzia de sa femina ma si sos duos non sunt de sa matessi bidda, tando sa femina cheret chi lesset sa domo sua e-i sa bidda sua e fettat domo in sa bidda de su maridu.

images-163Finas pro custa funtzione b’est su pane s-i sos dulches fatos a posta: Coros de mendula e mele, Turtighedda de mele, sa turta de s’isposa de mele, su pane de s’affidu (tottu bene tribagliadu chiparet bessidu dae sas manos de fadas

Cumprida sa tzerimonia in cheja s’isposa setzit a groppa cun su sogru chi che la leat a sa bidda sua cun tottu sos invitados.

Tottu sunt a caddu, mannos e minores.

S’isposu torrat a bidda iscurrizende cun sos amigos. Su sogru cun dun’ebba maseda e-i sa nura a groppa, torrat a passu pàsidu e sulenu.

In sa bértula tenet tres panes. Unu che l’imbolat in su riu o rizolu a lacana tra sa bidda sua e-i sa bidda de s’isposa. Su de duos che l’imbolat in s’intrada de sa bidda e su de tres in s’ortu de sa domo.

Su signifìcu de custos tres panes est custu: su sogru cheret narrer a sa nura chi dae su mamentu de s’affidu issa appartenit a un’atera bidda chi at lacanas pretzisas in su riu, a s’intrada de bidda e in sa corte.

Dae igue tottas sas dies sunt che pare: Tribagliu e domo, domo e tribagliu cun calchi festa in bidda o fora de bidda.

E gai si pesat sa familia comente amus nadu faeddende de sos tempos de sa vida de s’òmine finas a-i como.

In banca su tribagliadore de una bolta si setziat a chenare o in die de festa.

Sos chi restaiant in domo bustaiant che-i sos chi andaiant a campagna ca sa familia sarda s’inghiriaiat a sa mesa cando fit totta aunida.

 4. Su tempus su de battor

Su de battor est su tempus de sos congruos.

S’òmine sardu lassat sa vida in su matessi logu inue l’at àpida: in dun’istoja serente su foghile. Comente morit s’òmine si nde bochit su fogu e restat mortu finas a cando parentes o amigos, passadu nessi unu mese, sensant de sustentare sa familia in corruttu.

   images-182Cando est a proa a morrer un’òmine, in Sardigna bessint sinzales de onzi manera: su cantu de s’istria, su rotziga – rotziga de sa tàrula e gai sighendebila.

Su nùntziu de sa morte lu dant sas campanas de sa cheja sonente sa ressigna. Dae su sonu si cumprendet si est unu piseddu, unu zovanu, un omine fattu o unu betzu.A inghìriu de su mortu sas attittadoras cantant s’attittidu chi est unu cantigu seriu e de morte cando no est finas de vinditta. Pro custa rejone sa cheja at privu de cantare s’attittidu.

Pro sa morte sos parentes custrintos ponent su luttu bestendesi a nieddu pro unu tempus de tres annos a infora de sa viuda chi tenet su luttu totta vida.

  Fattu s’interru parentes e amigos de su mortu ammanizant una chena chi si narats’acconortu.

Sa familia de su mortu non podet retzire uras ne pro festas e ne pro Pascas fin’a cando non si nde bogat su luttu. Finas sa domo si bestit a luttu si b’at unu mortu: pro nessi unu mese restat a gianna e a balcones serrados e sena fiores.

Su viùdu, cando li morit sa muzere, restat nessi pro unu mese sena si fagher s’arva e sena si tramunare nemmancu sa biancheria .

A punt’a su mese si faghet s’arva, si tràmunat e, si cumbinat, si chircat sa femina.

images-19A punt’a su mese e a punt’a s’annu sa familia de su mortu suighet su pane de sas animas chi apparat a parentes e a amigos chi ant aggiuadu e dadu a mandigare sos chi fint in corruttu

 

LASCIA UN COMMENTO

RSS Sottoscrivi.