Accademia sarda di storia di cultura e di lingua

Su banzu de sos caos de Anghelu de sa Niéra

Angheleddu de Abbaidamonte, cando fit minore, non fit malu, ma comente sutzedit in  pitzinnia, si lassaiat giughere dae sos cumpanzos de giogu. Una bolta tiu Nieddone, torrende dae tribagliu  e passende a caddu a s’ainu in carrela Garibaldi incominzat  a narrere:

-Fizos mios in sa Rughe bi sunt sos caos a furriadura pruite ant  bogadu dae pagu su triguindia, si bos cherides fàghere sos boes andade a bos nde leare, fetendel’ischire primu a mama bostra, bos recumando!-

Sos cumpanzos chi aiant intesu a tiu Nieddone, (cum megus fint Ico, Giuanninu, Faricu e Zinu), current deretu  a dimandare su permissu a sas mamas issoro, deo ando a domo, ma mama non bi fit. E gai, pessende chi fortzis deo aio fatu  primu  de mama  a torrare a domo ando cun sos cumpanzos a mi leare sos caos pro mi fagher sos boes. Currende a tota fua no che cabulamus in Caminu de Litu, in su buscu de sos Frassos e giompimus  a sa Rughe.

-Mama mia cantos caos!- faghimus ispantados.

– Donniunu si nde carrighet cantu nde podet!- Tichirriamus.

Deo chi aio chimb’annos mi che beto subra su montiju de sos caos e nde leo cantu poto e che a mie faghent sos cumpanzos e currende pius de primu cun sos bratzos ligados a mata, torramus a bidda. Peristantu però mama fit torrada dae Funtana Noa cun s’abba e m’aiat chircadu abboghinende. Sigomente fit boghialtina s’ichintendiat  in Caminu de Litu:

– Angheleddu, Angheleddu, torra a domo!-

Sa disfortuna fit puru chi mama si fit posta a abboghinare in carrela de tia Nenalda Cossiga chi cando l’at intesa li narat:

-Muda coma’ sun’andados totu a sa Rughe a si leare sos caos, già sunt torrende!-

-Custu non mi lu deviat faghere, Angheleddu, l’ap’iscutu unu banzu s’àtera die cando est pigadu a Cudinarasa e come peus a  peus si ch’andat a sa Rughe!-

In mesu a su ciarra ciarra acò a mie cun sos caos. Mama, comente m’idet, chi fit alta e mani pesuda, mi leat a sa pèrrias  e incomintzat a mi matzare chena miserigordia.

– No lu fato pius!- Incominzo a tichirriare.

Sos caos peristantu unu fat’a s’àteru che fint falados dae sos bratzoz mios in carrela de tia Tzitziglia in ue s’ainu de tiu Pepe Birraldu  si los fit mandighende unu fat’a s’àteru.

E deo malancinidu e colzu, leadu dae mama che Pinocchio in sa bidda de sas Maravizas, e bene bene istultinadu aia perdidu sos caos  e m’aia leadu una bellu banzu dae mama chi cantu fit bella fit  puru mazadora.