Accademia sarda di storia di cultura e di lingua

Sa lenda de sas animas de sas rocas de Magola di Mario Unali

In sos tempos antigos meda, sos bisajos nostros viviant in sas pinnetas e in sos barracos covacados a ude e a tiria, e puru a restuju cando non b’aiat ne una e ne atera. Sa covaccura a ude fit sa mezus ca pruite baiat pius appoggiu in s’ierru e pius friscu in s’istadiale. Ma, non potende ateru mezus, ogni cosa fit bona pro covaccare. Medas, sos pius poverittos si gosaiant de che drommire sutta a sas gruttas chi sa natura aiat fattu dae cando est fattu su mundu.

Calecunu bi faghiat unu muru addainanti pro b’aer pius appoggiu, e pro chi su entu ei s’abba non ch’esserent intrados aintro. Medas’ ateros mancu cussu, e tando, che drommiant aintro cun su pagu bestiamine; sa pius boltas a carr’a pare cun cuss’ainu o sas arveghes chi ti teniant sa carena calda totta notte. In sas roccas de Magola tottu in s’intorinu de sos paris de sa Cudinas, ma puru de fronte in sas Carpidas, sutta a sa Tanca de sa Linna, e in Conca de Zuìghe pro su propriu, b’abitaiant diversas familias. Tottu cun pagu bestiamine ma de bona titta, ca su logu fit, e est puru oe, ricu meda de abbas currentes e de benas de abbas portentosas e meighinosas. Diffattis, in cussu drettu bi naschet su riu de sos Cannedos e dae monte Ledda nde falat riu Crabianu, chena contare sas richesas de sas abbas de sos drettos de S. Justa e aintro sa Tanca de sa Cheja, cun sa funtana de Magola. Tottu custu, pro bo narrer cantu fint bonos sos terrinos pro su laore, ei sas fruttures, ei sos pasculos de bona salija. Sas comunidades fint de bonu arresettu e cando fit su mamentu de su bisonzu, una andaiat a aggiuare s’attera, e daeboi de su tantu tribagliu si faghiant bellas festas, cun cantos e ballos fintzas a s’impuddile. In d’unu dei custos cumbenios, in d’una annada bona de laore e de ogni bene de Deus, una notte mala, in d’unu irridu de abba, comente Deus la cumandhaiat, nde falat sa rocca pius manna de Magola, e che carralzat totta sa zente chi bi fit sutta: mannos e minores, omines e feminas, cun mannu disaccattu pro tottu, fintzamentra pro su bestiamine.
Leados dae su disisperu pro sas perdidas, chie de su babbu o de sa mama, chie de sos fizos e ateras parentelas, sa zente si recueit in sas ateras gruttas, cun su coro tibi taba, pro tottas sas mortes chi bi fint istadas. Gai che passat su tempus ei sas zentes fintzas a arrivare a oe.
Diffattis in sos annos baranta de su noighentos, giaju Pedru, aiat su petzu de Cischeddu Ruju a lacana cun sa Tanca de Laura, e, in su cunzadeddu che poniat sos boes, quasi semper abilandrados. Su manzanu chito aveschende sa die ch’acciapaiat sos boes semper fora e in logu anzenu. Issu fit omine pacificu, de bonu impidu, e de bona paghe cun tottu su ighinu, e non cheriat brigare cun niunu pro perunu motivu, e nemmancu ca sos boes illaccanaiant in terrinu anzenu. -“Ma chie bulvura allutta est, chi mi faghet cust’affrontu”? Ne nada e ne fatta, sa die apoi cando fit intirinende, mudu mudu e chena l’esseret bidu anima bia, sicche colat riu riu, e sicche cuat a pinna de unu muru a giaru de su cunzadu. A cando, ant’a essere istadas, sas tres o sa battoro de manzanu, in s’aera totta piena de lentore e de muffore s’intendent custos sonos, ei custas boghes de lamentos de ifferru, chi s’isparghent in tott’ue in s’intorinu, e chi ti ponent unu prammu de tuddu in sa trae de s’ischina. Sos boes chi fint pasculende chi essint muizende, che raju alluttu de fogu, e che brincant su muru in tundu, finzamentra bene inpinnadu de prunitza. Giaju, fattu fattu, si casalat su bonette e, dae sa timoria, currende a totta fua, li toccaiant sa bottes in culu. Sas animas de sos poverittos chi fint mortos seculos prima, no aiant appidu ancora pasu, e d’ogni notte, in sas rocas de Magola, si poniant a ticchirriare in chirca dei cuddu pasu, chi d’ogni anima de chie est mortu, devet aere pro sa vida eterna.